KALIBO, Aklan—Ginpaeawig it daywang domingo it Provincial Inter-Agency Task Force (IATF) ro pagpatuman it modified general community quarantine (MGCQ) “with highest restrictions” sa bilog nga probinsiya it Aklan umpisa Hunyo 22 hanggang Hulyo 6, 2021.
Suno kay Kalibo mayor Emerson Lachica nga ginkasugtanan sa ginpatigayon nga emergency meeting nga hugut sa gihapon nga igapatuman ro border control checkpoints sa kada banwa sa Aklan.
Tuyo kara nga malimitahan ro hueag it mga tawo kasunod it grabeng pagsirit it kaso it covid 19.
Nasayuran nga ro ginasugtan eamang hay ro mga essential workers ag importateng paeanawon kun sa siin hay nagakinahangean raya it travel pass.
Kadungan kara, nag apela si mayor Lachica sa publiko nga seryosohon ro pagsunod sa safety and health protocol kapareho it pagsuksok it face mask ag face shield, pag-obserba it physical distancing.
Ginpadumdum pa kara nga likawan ro mass gathering ag ro pag-inom it aeak bangud sa ginapatuman nga liquor ban.
Samtang, natalakay pa sigon sa pueong ro angot sa madasig nga pagpatigayon it contact tracing sa sueod it 24 oras sa mga nakasalamuha it covid patient agud nga ma-isolate eagi ro mga high risk contact ag mabutang sa quarantine facility ro mga nagpositibo agud nga malikawan ro mas pang pagkalhit it virus.
