Pilang adlaw eon lang ag magatapos eon ro dag-on, apang padayun sa gihapon ro pagpadumdum it mga natungdan partikular ro Philippine National Police-Anti Cyber Crime Group sa publiko nga padayun nga mag-dahan sa online transactions kun sa siin aktibo gihapon ro mga kawatan.
Base sa record it PNP Anti Cyber Crime Group, pinakamataas nanda nga nailista nga cybercrime hay ro estafa ukon swindling nga ginsundan it hacking, identity theft, online libel, grave threat ag anti-photo ag video voyeurism umpisa Enero 1 hasta ko Nobyembre pa eamang.
Sa pagsueod it Disyembre mas ginaeauman ro pag-grabe pa it mga pagpangloko.
Nasayuran nanda nga sa makarondaya nga paniempo maskin paalin hay may kwarta ro kaabuan bangud sa mga nabaton nga 13th month ag bonus it mga empleyado.
Uso gihapon ro mga gina-offer nga online.
Nagkaeain-eain nga produkto ag item.
Mayad ro marketing it iba bangud nga todo pakita pa it mga litrato apang bogus ag bukon gali it matuod.
Kun may bogus seller, may una man nga bogus buyer nga kaeabanan nga sa online transactions nagakatabu.
Sa makaron nga paniempo, dapat gid man nga maging mapag-usisa.
Indi basta-bastang magpati sa mga buladas online agud nga indi mabiktima it mga kawatan.
Kon pwede hay i-doble check anay ro tanan agud nga sa ulihi hay owa it pagahinoesuean.
