KALIBO, Aklan – – – Padayun nga gina-imbestigahan makaron it mga kapulisan ro report it sangka negosyante ag resort owner sa isla it Boracay nga nakabaton sigon it tawag sa telepono kun sa siin hay gingamit ro pangaean ni Department of Environment and Natural Resources (DENR) secretary Roy Cimatu agud nga makapangayo it kwarta.
Sa interview it Bombo Radyo Kalibo, nagpaandam si Mr. Crisostomo “Cris” Aquino, tag-ana it kontrobersyal nga West Cove Resort kontra sa bag-ong phone scam nga ro target hay mga stakeholders sa isla.
Nakabaton sigon imaw it tawag halin sa nagpakilaeang tawuhan ni Environment Secretary Roy Cimatu ag nagapangayo it donasyong nagabalor it kapin sa P1.5 million pesos para sa rehabilitasyon it 300 nga drug dependents sa Nueva Ecija nga kon sa siin 5,000 pesos ro sangka tawo.
Insigida sigon nga nagtawag si Aquino sa central office it taeatapan ag nagpanindugan nga owa sanda it kahilabtanan kara.
Suno pa kay aquino nga ginhambae it caller nga ipadaea ro donasyon sa sangka Robert Soria sa Palawan, Nueva Ecija pinaagi sa sangka remittance service center.
Nagpaandam pa sigon ro caller nga nakataeana eon nga maga-abot sa Boracay ro mga tawuhan it Environmental Management Bureau it DENR agud nga mag-imbestiga sa mga violators sa isla.
Owa sigon nadayun ro andang transaksiyon kat matunugan it caller nga medyu nabuking eon imaw sa anang modus.
