KALIBO, Aklan—Agud suk-ean ro vote-buying sa maabot nga eleksyon sa Mayo 12, ipatuman it Commission on Elections (Comelec) ro nationwide “money ban” nga nagabawae sa pagdaea ukon pagbiyahe it masobra sa ₱500,000 cash ukon katumbas kara sa foreign currency.
Ginpaathag ni Atty. Christian Itulid, election officer IV it Comelec Kalibo, ro ban hay sandig sa Comelec Resolution No. 11104 nga magiging epektibo halin Mayo 11 hasta Mayo 12.
Sakop kara ro cash nga may kaibahan nga campaign materials nga posibleng ebidensya it electoral offenses.
Ginpabaskog nga checkpoints it Comelec ro magapatuman it inspeksyon, kabulig ro gun ban checkpoints.
Mga lehitimong cashiers eamang ro exempted, kon may bastanteng dokumento.
Paandam it Comelec, ro mga makadueodang transaksyon nga eampas sa ₱500,000, kaibahan eon ro maeagkuang withdrawals ukon transfers hay pwedeng ikonekta sa vote-buying.
Ro mga magaeabag hay magapangatubang sa disqualification ag legal nga aksyon.
