KALIBO, Aklan–Padayun ro panawagan it Presidential candidate, negosyante ag Moro leader nga si Faisal Mangondato nga makaangkon it bag-ong sistema agud nga mataw-an it daean ro mas manami nga puturo ro Pilipinas.
Sa ginpatigayon nga Comelec-KBP PiliPilipinas 2022 forum, ginpahayag it Katipunan ng Kamalayang Kayumanggi Presidential bet nga tiempo eon agud nga magsaylo ro nasyon sa bag-ong sistema agud nga maresolba ro mga problema nga ginapangatubang it komunidad nga nagapa-antus sa mga pumueuyu.
Ro dati suno kana nga problema hay nagapabilin nga problema makaron bangud sa luma nga sistema kun sa siin mabudlayan ro maskin sin-o man nga presidente ro magapungko.
Gindugang pa ni Mangodato nga agud nga mas pang mapaeapit ro gobyerno sa tawo, igaduso kara ro pederalismo engkaso nga swertehon sa maabot nga eleksyon.
Sa pihak nga parte, matapos nga ginmandu ni Pangueong Duterte ro pagpapundo sa operasyon it e-sabong, gin-insister ni Vice-Presidential candidate Carlos Serapio nga dugangan pa ro produksyon agud nga makaangkon it trabaho ro maabu nga mga Pilipino.
Kapareho it anang running mate gusto man nana nga magsaylo eon ro presenteng sistema it gobyerno sa pederalismo sa oras nga mailihir.
Ginaduso man nana ro people empowerment , pagpabaskog sa Covid-19 pandemic response, pagbangon it ekonomiya ag korapsyon sa gobyerno.
