KALIBO, Aklan–Kapareho sa Pilipinas, ginaselebrar man sa rehiyon it Hong Kong ro Mother’s Day.
Suno kay Bombo International Correspondent Mary Lou Bautista Borra it Hong Kong nga raya ro kahigayunan kung siin ro magpamilya hay nagatao it oras para makaibahan ro kada isaea.
Kaeabaan sigon nga ginaselebrar it mga pumueoyo ro okasyon pinaagi sa pag-adto sa mga lugar pamasyaran ag pagkaon sa mga restaurant kaibahan ro bilog nga pamilya.
Masami sigon nga gina-adtunan it mga tawo hay ro baybayon kung siin ro iba kanda hay nagadaea pa it tent.
May pila man sigon nga nagatao it boquet, cake ag regalo sa andang mga ina.
Sa pihak kara, owa gihapon suno kana it makapiyerdi sa selebrasyon it mga Filipino bangud sa grabeng pagpalangga nga ginapakita sa kada ginikanan.
Sa pihak nga parte, aminado si Borra nga grabeng sakripisyo ag kasubo ro ginabatyag it kapareho nana nga Overseas Filipino Worker (OFW) eabi pa ag maeayo sanda sa andang pamilya.
Indi sigon matumbasan it anumang kantidad ro andang kahidlaw apang kinahang-ean nanda raya nga tiison para sa kamaeayran it andang pamilya.
Maskin malisod suno kana nga mapaeayo sa anang unga ag asawa hay padayun imaw nga nakikipagsapalaran sa ibang nasyon para mataw-an it manami nga puturo ro anang bilog nga pamilya.
