KALIBO, Aklan—Padayun pa nga ginatumod ro motibo it pagbaril-patay sa sangka kolektor it motorcycle dealer nga si Julius Cuesta sa Barangay Caano, Kalibo, agahon it Martes.
Suno kay P/Major Willian Aguirre, deputy chief of police it Kalibo Municipal Police Station nga ro 31-anyos nga biktima nga tumandok it Barangay Tambak, New Washington hay gin-abangan ag ginsundan it motorcycle riding suspects samtang nagapasueod sa anang trabaho sa banwa it Kalibo.
Matapos sigon nga gin-ipingan raya it mga suspeks hay ginbaril sa anang ueo nga naging rason it anang hinali nga kamatayon.
Gin-eaum pa sigon it ibang mga residente sa lugar nga sangka vehicular accident ro natabu bangud nga antes nga nahueog sa kilid it kanae ro anang ginamaneho nga motorsiklo hay nakabati sanda it sangka eupok ag nagpagiwang-giwang raya sa karsada.
Ro insidente suno kana hay padayun nga ginatutukan it investigation section it kalibo pnp kaibahan ro intelligence operatives kun sa siin kaibahan sa andang gina-usisa hay ro mga CCTV footages nga maeapit sa nasambit nga lugar kamana man sa mga posibleng gin-agyan it mga suspek.
Ginatinguhaan man sigon nanda nga mabuksan ro naretrieve nga cellphone it biktima nga gin-isyu it andang kompaniya ag personal nana nga telepono para sa vital information nga pwedeng mabo-oe.
Pila sa mga motibo nga andang ginatan-aw hay ro job related matapos nga ro biktima hay sangka credit investigator ag in-charge sa mga delinguent account ukon mabudlay sukton nga mga kliyente kamana man ro personal grudge.
Ginduea man nana ro pagkabaeaka it publiko bangud nga isolated case sigon ro natabu.
Samtang, indi pa mahambae ni Major Aguirre kon may grupo it mga hired killer sa probinsiya bangud sa serye it mga natabu nga pag-atake it motorcycyle riding suspect.
