KALIBO, Aklan — (Update) Padayun pa nga ginatumod ro motibo it pagpamaril sa sangka habal-habal driver it kaparehong driver pasado alas-9:00, gabi-i it Biyernes, Agosto 16 sa Brgy. Dingle, Banga.
Ro biktimang si Diomedes Reloj, sa legal nga edad ag residente it Brgy. Polo it nasambit nga banwa hay padayun nga naka-confine sa Aklan Provincial Hospital matapos nga eumapos ro bala sa anang tuo nga dapa-dapa.
Samtang, ro suspek nga si Godofredo Masongsong, 71, kasimaryo man it nasambit nga biktima hay naka-kulong eon sa custodial facility it Banga Municipal Police Station matapos nga maaresto it mga rumespondeng pulis.
Ginasugid nga si Masongsong hay sangka ex-convict ag bag-o eamang nga nakahilway halin sa haeos 30 anyos nga pagkakulong sa New Bilibid Prison.
Padayun pa nga ginatumod makaron it barangay council it Dingle kon may kamatuoran ro mga alegasyon nga bangud sa pagpang-bully it suspek sa unga it biktima nga si Angelo ro ugat it insidente.
Base sa report, samtang nagahana nga mag-backing si Reloj sakay it anang motorsiklo hay ginbaril raya ni Masongsong.
Pagkatapos it insidente hay nagdaeagan ag nagpanago ro biktima it masobra sa ap-at nga oras antes nga nagpangayo it bulig nga madaea imaw sa ospital bandang alas-11:45 it gabi-i.
Sa pihak nga parte, samtang gina-inusoy ro biktimang si Diomedes, gindaea man it mga otoridad sa ospital ro anang unga nga si Angelo matapos nga gina-alegar nga gin-eampusan it bote sa ueo it anang tiyo nga namueaw-mueawan.
