KALIBO, Aklan — Patay ro sangka rider matapos nga sumunggab ro anang ginasakyan nga motorsiklo sa sangka Montero SUV sa national highway nga sakop it Sitio Tigbao, Brgy. Lalab, Batan, agahon it Lunes, Disyembre 8.
Suno kay P/Lt. Luisito Concepcion, hepe it Batan Municipal Police Station nga ro 31 anyos nga biktima nga tumandok it Estancia, Iloilo hay gindeklarang dead on arrival sa Aklan Provincial Hospital tuga it grabeng nina sa ueo ag iba pang parte it anang eawas.
Sa imbestigasyon, ginpahayag it sangka motorista nga nagatindog nga testigo sa natabu nga aksidente, samtang nagabiyahe paagto sa Balete nga direksyon kat nag-overtake kana ro biktima sakay it anang motorsiklo nga Suzuki smash, apang pag abot sa pakurba nga karsada hay nag-overshoot raya ag bumangga sa kasubeang nga Montero.
Ginpahayag dugang nga may kadasigon ro pagmaneho it biktima nga ginasugid nga magapauli sa Iloilo .
Ro driver it Montero hay temporaryo nga gin hold sa Batan MPS para sa nagakaigo nga disposisyon.
Nag-atubang ro driver it Montero ag pamilya it rider kon magapasaka it kasong reckless imprudence resulting in homicide ukon makaangkon it amicable settlement.
Ginasugid nga haeos indi pa mabaton it pamilya it rider ro natabu bangud nga bugtong nga unga nanda ro biktima.
Sa kabaskog it pagkabunggo, inapok ro biktima ag tumama ro ueo sa sementadong kalsada nga anang ginkamatay maskin nga may suksok pa raya nga helmet .
