KALIBO, Aklan—Nagapangatubang sa kasong Reckless Imprudence Resulting to Homicide ro sangka van driver matapos nga mabungguan ro sangka motorcycle rider sa Sitio Agpasi, Brgy. Cabangila, Altavas, Aklan.
Ro van driver nga si Roger Gomez, 44-anyos ag residente it Brgy. Balabago, Jaro, Iloilo City hay presenteng nakakulong sa Altavas Police Station.
Nasayuran nga insigidang namatay ro biktimang si Ronalyn Z. Rose, 24 anyos, residente it Brgy. Bacan, Banga, Aklan ag empleyado it PENRO Mambusao sa probinsiya it Capiz.
Sa imbestigasyon it pulisya, nag-angkon it patal nga lastro sa ueo ro biktima nga naging rason it anang hinali nga kamatayon.
Natabu ro insidente bandang alas 8:30 kaina it agahon sa nasambit nga lugar.
Paagto kunta sa Capiz ro biktima sakay it anang motorsiklo apang nahapit raya it pampasaherong van nga ginamaneho ni Gomez.
Nag overtake sigon ro nasambit nga van sa sangka truck apang kat bumalik raya sa anang linya hay owa kara napan-uhan nga sa prente gali it truck ro motorsiklo.
Nasaeawig kara ro motorsiklo nga naging rason it anang pagkatumba.
Bangud sa impact it banggaan hay inapok ro helmet it biktima.
Nadaea pa sa Altavas District Hospital ro biktima apang gindeklara nga patay eon kat maka-abot sa nasambit nga ospital.
