Kalibo Aklan ———–Namatay samtang ginabueong sa Aklan provincial hospital ro sangka motorista matapos nga masunggab sa kasub-eang nga tricycle bandang alas-7:00 kabie sa Brgy. Bacan, Banga.
Ginkilaea ni P/Cpl. Jim Zulueta it Banga PNP ro biktimang si Rommel Navarra, 33-anyos kon sa siin nakaangkon raya it fatal nga lastro sa ueo samtang ginrefer man sa out patient department ro anang backrider nga si Jenny Icay, 26-anyos ag parehong residente it Brgy. Poblacion sa nasambit nga banwa.
Samtang sa pihak nga parte, ginkilaea man ro driver it tricycle nga si Zander Cuaduro, 38-anyos it Brgy, Sigcay, sakay ro anang pasahero nga si Dave Rebaldo, 21-anyos it Brgy. Lapnag sa nasambit man nga banwa.
Natabo ro insidente sa underconstruction nga karsada kon sa siin pareho ro mga raya nga una sa idaeom it impluwensya it aeak nga nagamaneho sa andang tagsa ka mga behikulo.
Ginasugid nga halin sa banwa it Banga ag pauli eon kunta sa Brgy. Sigcay sanday Cuaduro kat masub-eang it mga raya sanday Navarra sa nasambit nga lugar.
Ro insidente hay nakataeana nga istoryahan it magtimbang nga parte samtang ro andang mga behikulo hay naka-impound makaron sa Banga Police Station para sa nagakaigong disposisyon.
