KALIBO, Aklan — Gulping nagdabdab ro motorsiklo it sangka babawe sa guwa it sementeryo sa Numancia, Aklan.
Suno sa rider nga si Rehana Alovera, kaibahan ro anang ina ag manghod nga babaye ag puro mga residente it Barangay Dongon West, Numancia, Aklan nga magabisita kunta sanda sa panchon it andang pamilya kat gulpi eon lang nga nagdabdab ro prenteng parte it motor.
Mayad eon lang sigon ag gilayon sandang nakapanaog ag uwa nakaangkon it anumang paso sa eawas.
Samtang, ginapatihan ni FO1 Rico Nam-ay, imbestigador it Bureau of Fire Protection (BFP)-Numancia nga nag-short circuit ukon nakaangkon it problema sa wiring it motorsiklo nga sangka Honda Wave 110.
Sa pagresponde it mga bumbero sa lugar, insigidang naapula ro kaeayo ag maswerteng uwa naeamon it husto ro motorsiklo.
Inde pa matumod sa makaron it tag-iya ro kasamaran nga tuga it insidente.
