KALIBO, Aklan—Target it Municipal Planning Development Office (MPDO) nga matapos eon it turnover ro nabilin pang housing unit sa mga kwalipikadong benepisyaryo sa bahin it Brgy. Briones, Kalibo.
Suno kay Engr. Marlo Villanueva it MPDO nga nakataeana eon nandang iturn over ro nabilin nga mga housing unit sa maabot nga Oktobre 29, 2021.
Nasayuran nga naga-abot sa 400 ro kabilugan nga unit it pabaeay kung siin masobra 300 eon ro natigayun nga mai-award sa mga housing recipient.
Aminado si Engr. Villanueva nga bangud sa ginapatuman nga nagkaeain-eain nga quarantine restrictions sa probinsya rason nga napaiway ro pag-award it pabaeay.
Nagaeaum sigon sanda nga mag-atender ro tanan nga benepisyaryong ginpadaehan nanda it sueat para makompleto eon ro pag-award.
Kaibahan sa nasambit nga aktibidad ro pagtao it yabe ag pilang ka mga dokumento.
Sa oras sigon nga maka-apply ro mga housing recipient para sa koneksyon it kuryente aga tubi hay pwede eon nanda rayang maistaran.
