KALIBO, Aklan—Hugot nga ginpanindugan ni Mr. Alden Dela Vega it Barangay Ambolong, Batan nga inde imaw magsuporta ag magboto sa kandidato nga ginaduso it anang ingkampod nga si Adonis Sarceno nga naging mitsa it andang uwa pagkaintindihan hasta sa naghalin imaw sa eogta nga anang ginaistaran it masobra sang dag-on eon.
Suno kana, ko tyempo nga imaw nagkinahang-ean it bulig sa ginaendorso nga kandidato hay uwa imaw pag-ulikda hasta nga umabot sa punto nga ro ginatrabahuan nana nga funeral service ro nagpahueam kana it saeakyan para sa anang asawa nga gin-operahan.
Dugang pa ni Mr. Dela Vega nga ginpanindugan eamang nana ro anang prinsipyo kon sa siin naghambae sigon si Sarceno nga magpull-out sa ana nga eogta rason nga gintuman raya ni Dela Vega ag insigidang ginpanghukas ro anang baeay sa bulig man it anang mga kaeapit baeay.
Samtang sa pihak nga parte, ginklaro ag gin-insister ni Mr. Sarceno nga uwa mat-a nana ginpahalin sa anang eogta si Dela Vega ag raya mat-a mismo sigon ro nagdesisyon nga maghalin.
Ginpahayag dugang nga naging maayos ro anang pag-istorya ag ginpaabot eamang nana ro paghinyo man it kandidato nga mabahoe man ro naging bulig sa andang pamilya.
