KALIBO, Aklan–Haum eon ro Malay Tourism Office para sa pagbuhos it maabu nga turista sa Isla it Boracay kasunod sa nagahilapit nga Love Boracay.
Ginpahayag ni Malay Tourism Officer Felix Delos Santos nga may nakapahaum eon sanda nga mga schedule it nagakaeain-eain nga aktibidad para sa naga hilapit nga pagselebrar it labor day nga maga-umpisa sa adlaw it biyernes, April 29.
Suno kay Delos Santos, nagkaeain-eain nga Environmental activities kapareho it beach cleanup ro igapatigayon it anda nga taeatapan.
Sa pihak nga parte, nakalista eon sigon ro Malay Tourism office it kapin sa 150, 419 nga mga turista nga nagbisita sa Isla umpisa ku april 1 asta it april 25 nga kung siin sandig sa anda nga datus may kapin sa 5000 asta 6000 nga mga turista ro nagasueod sa Isla kada adlaw.
Sa kabilugan nga nalisita nga numero it Malay tourism Office kaeabanan kara hay halin sa domestic tourist nga kapin sa 90%, Foreign tourist 8% ag kapin sa 2% ro mga Overseas Filipino workers ukon OFW.
Samtang, nagarequest man ro Department of Environment and Natural Resources Aklan ukon DENR-Aklan sa Department of the Interior and Local Government nga pagarebyuhon ro pagdugang it carrying capacity it mga turista bangud ro recommended carrying capacity nga ginapatuman sa makaron hay sakto eamang para sa mga domestic tourist ag kueangon gid kapin kung maga-”full blast” eon ro aeabutan it mga foreign tourist.
