KALIBO, Aklan–Nagakabaeaka ro Multi-sectoral groups sa isla it Boracay nga mabalewala ro lokal nga otonomiya it lokal nga gobyerno it Malay sa oras nga maduso ro ginaproponer nga Boracay Island Development Authority ukon (BIDA).
Suno kay Punong barangay Nixon Sualog it Barangay Manocmanoc, Boracay nga sa oras nga mataw-an it katumanan ro BIDA nga ginaduso nga magiging government owned and controlled corporations ukon GOCC hay sanda eon ro magadumaea sa bantog nga tourist destination ag maitsapwera eon ro LGU ag maskin ro andang pagdumaea sa barangay.
Makabig sigon raya nga pag-eabag sa Local Government Code of 1991.
Ginpasiguro sigon it andang grupo nga ‘One Boracay’ nga pagasuportahan nanda ro kagustuhan ni Presidente Rodrigo Duterte nga pagabantayan ag ipabilin ro kaayusan kamana man nga paga-amligan ro palibot ag dunang manggad it Boracay.
Angot kara, gusto man sigon it andang grupo nga paeawigon eon lang ro mandato ag operasyon it Boracay Inter-Agency Task Force (BIATF) nga gintukod it Presidente ko Mayo 2018 kat ro isla hay temporaryong ginpasarado agud nga taw-an it daean ro maeapnagon nga paglimpyo ag rehabilitasyon.
Nasayuran nga ro ‘One Boracay’ hay ginaeakipan it mga punong barangay it Malay, mga empleyado it LGU-Malay, mga negosyante, transport groups, mga mangingisda, photographers, ag iba pa.
