KALIBO, Aklan—Nagpangayo it pasaylo ro municipal engineering office it lokal nga gobyerno it Banga, Aklan sa matsa pag-baboy sa rebulto ni Jose Rizal.
Raya hay kasunod it nagkalhit nga litrato sa social media it rebulto it ginakabig nga national hero nga gintapok eamang sa binit it public plaza ag owa it maayos nga pagtrato.
Ro nasambit nga hitabu hay eubus nga ginkadismaya it mga taga-banwa it Banga nga umani it nagkaeain-eain nga reaksyon.
Aminado si municipal Engr. Hermie Seraspi nga may andang kakueangan bangud nga owa eagi nanda ginhimos ro luma nga rebulto matapos nga bayluhan it bag-o.
Ginpahayag dugang nga ginbutang eon nanda ro rebulto sa karton ag gintago sa bodega bangud nga medyu gabok eon raya.
Nagahueat eon lang sigon sanda it advise halin sa andang alkalde sa tamang disposal it rebulto.
Ginklaru pa ni Seraspi nga ro pagbaylo it bag-ong rebulto hay kaparte it andang rehabilitasyon ag development it andang Banga public plaza.
Nasayuran nga halin sa dating lokasyon sa prente it plaza hay ginsaylo raya sa prente it simbahan, kun sa siin hay may pintura nga gold.
