KALIBO, Aklan–Nagbutang anay it temporaryong aeagyan ro Municipal Engineering Office pinaagi sa pagbutang it steel plate agud nga may maagyan ro mga residente nga magatabok sa Sitio Pigado, Barangay Bakhaw Norte, Kalibo.
Raya hay matapos nga gin-umpisahan eon ro repair sa portion it approach ukon saeangduhan it hanging bridge nga nagakonekda sa Bakhaw Sur ag nasambit nga lugar.
Angot kara, ginpaathag ni Municipal Engineer Amalia Francisco it LGU-Kalibo nga na-wash-out ro idaeom nga parte it nasambit nga tulay matapos nga ginkabkab ro pondasyon kara tuga it mga pag-inuean ko nagtaliwan nga mga inadlaw nga naging rason it pagtaas ag pagbaskog it sueog it tubi.
Ro saeangduhan eamang sigon ro may problema ag owa it kahalitan ro tulay mismo.
Ginpahayag dugang nga owa it kabilya ro nahuslog nga semento bangud nga makarondaya gid man ro design it ginatawag nga concrete cement pavement.
Sa pihak nga parte, gindugang pa ni engr Francisco nga agud nga malikawan ro anuman nga aksidente hay ginpakamayad it anang taeatapan nga i-repair eagi ro portion it saeangduhan gamit ro backhoe ag jack hammer.
Nagbutang man sigon sanda it nagakaigo nga warning signs ag nagdeploy it mga nagabantay nga empleyado it LGU Kalibo.
