Kalibo Aklan ———Owa pa it petsa kon hin-uno uman nga pagabuksan ro Municipal Hall it Altavas matapos raya nga ipaidaeum sa lockdown umpisa Hunyo 21, 2021 .
Raya hay matapos mag-positibo sa COVID-19 ro pilang empleyado it lokal nga gobyerno.
Suno kay Mayor Denny Refol Jr. nga kinahangean nanda nga suspindihon anay ro operasyon it mga opisina sa munisipyo para sa maid-id nga disinfection ag contact tracing.
Pila man sigon sa mga empleyado hay ginpaidaeum sa swab test kaibahan imaw ag sa mayad nga swerte hay nagnegatibo sa deadly virus .
Tuyo it nasambit nga tikang nga maprotektahan ro mga empleyado ag publiko kontra sa nasambit nga deadly virus.
Gindugang pa ni Mayor Refol nga ro opisina it ‘KALAHI’ ag MDRRMO anay ro temporaryong maga-isyu it travel pass para sa mga residente nga magabiyahe paguwa it banwa it Altavas.
Pila sigon sa andang mga empleyado hay work from home anay mag-eowas sa mga tawuhan it mga opisinang may kaangtanan sa health services ukon RHU ag disaster preparedness ukon MDRRMO.
Magiging virtual ro pagahiwaton nga pueong it mga tawuhan it lokal nga gobyerno kaibahan ro Sangguniang Bayan.
Sa makaron , ro banwa it Altavas hay may 100 nga COVID-19 cases, kun sa siin 43 ro active cases ag nagapabilin nga tatlo ro namatay .
Nasayuran nga ro pilang empleyado nga nagpositibo sa sakit hay naging close contact it pilang mga empleyado ag pulis it Altavas PNP nga nagka-COVID ko nagtaliwan nga mga inadlaw.
