Kalibo Aklan————Nagpatigayon it emergency meeting kahapon nga adlaw it dominggo, Hulyo 18 ro Municipal Inter-Agency Task Force sa banwa it Banga agud nga istoryahan ro may kaangtanan sa pagahimuon nga tikang angot sa kakueangan it quarantine facility nga ginabutangan it mga pasyenteng nagapositibo sa coronavirus disease (COVID-19).
Suno kay Donnalyn Siyambio, tagapaghambae it MIATF-Banga nga sa makarun hay nagakaubusan eun sanda it lugar nga pagabutangan it andang COVID-19 positive patients.
May kaangtanan kara, andang ginapangayo ro hugot nga kooperasyon it kada lokal nga gobyeno sa tagsa tagsa ka Barangay.
Engkasong owa eun gid it mahimo hay pagadesisyunan eun lang sigon nandang magpaidaeum sa home quarantine ro mga magpamilya nga nagapositibo sa COVID-19, apang nagakinahanean it matul-id nga pagbantay it mga opisyalis it Barangay.
Nasayuran nga base sa datos nga ginpaguwa kahapon it Provincial Health Office (PHO-Aklan) hay may una eun nga 101 ka mga aktibong kaso it COVID-19 sa banwa it Banga.
Sa nasambitan nga numero, 70 kara ro naka-facility quarantine samtang ro iba pa hay gindaea sa Barangay Isolation Unit, Local Covid Center, ag may una man nga naka hotel quarantine sa banwa it Kalibo.
Samtang, may una eun man nga 451 nga total cases it COVID-19 sa nasambitan nga banwa kung sa siin 352 sa mga raya ro naka-recovered samtang 8 man ro kabilugan nga numero it mga namatay.
