KALIBO, Aklan–Gintugyan eon it lokal nga gobyerno it Kalibo sa opisina it Municipal Planning Development Office pinaagi kay Engr. Marlo Villanueva ro pag-inspection sa daywang ka mga eskwelahan sa Barangay Poblacion partikular ro KISEC ag Kalibo Elementary School matapos nga magpasugot ro DepEd-Aklan nga gamiton ro mga pasilidad bilang COVID-19 quarantine facility.
Suno kay Engr. Villanueva nga nakapatigayun eon sanda it maidid nga pag-usisa sa lugar agud nga matumod kun nagakaangay ukon kompleto ro mga pasilidad.
Sambilog sigon sa andang ginatan-aw hay dapat nga nakasueod raya sa standard it Department of Health para gamiton bilang quarantine facility.
Tuyo sigon nanda nga mabutang sa maayos nga lugar ro mga pasyente ag mataw-an it nagakaigo nga pagtatap.
Pila sa mga plano nandang ibutang ag idugang sa pasilidad hay ro electricfan, maayos nga eugban, wifi connection ag iba pang importante nga butang.
Matueopangdan nga ginakabig makaron nga epicenter it COVID-19 ro Kalibo rason nga haeos punuan eon ro andang mga gintaeana nga quarantine facility nga ginaeakipan it daywang ka hotel ag evacuation center sa Brgy. Tigayon, Kalibo.
Mabahoe sigon ro maibulig it daywang eskwelahan bangud nga tig-20 nga kwarto ro sarang nanda nga maipagamit.
Sa pihak nga parte, ginpabugae man Executive assistant to the Mayor Mr. Basil Tabernilla it LGU-Kalibo ro pagtinguha ni Mayor Emerson Lachica nga madugangan ro quarantine facility it banwa sa tunga it padayun nga pagtinaas it kaso it COVID-19.
Sa oras nga maging operational, magiging pang ap-at eon nga Ligtas COVID Center (LCC) ro daywang ka mga eskwelahan.
Target man sigon nanda nga magbutang it 4 ka mga nurse nga maga-shifting sa pag-monitor sa mga COVID patient.
