KALIBO, Aklan—Ginkalipay it Municipal Tourism Office (MTO)-Malay ro pag-negatibo sa swab tests it an-om nga turistang nagpakita it peke sigon nga RT-PCR test results it COVID-19 agud makasueod sa isla it Boracay.
Suno kay kay Tourism Officer Felix delos Santos, makabig nga leksyon sa tanan ro insidente agud nga indi eon raya mauman.
Kaangot kara, mas pang ginhugtan ro pagsikyar sa dokumento it mga turista, kung siin, magapatigayun it verification ro validating team sa mga molecular laboratory nga nagpagguwa it andang test results.
Maeuwas kara, ro tanan nga mga nagasueod ag guwa sa isla kaibahan ro mga residente hay obligadong magpakita it QR CODE it health declaration kaibahan ro anumang valid ID para sa verification.
Samtang, ginpahayag man ni Police Lieutenant Colonel Jonathan Pablito, hepe it Malay Police Station nga pagkatapos makompleto ro 14-diyas nga quarantine period hay pagapasakaan it kaso ro an-om nga turista bangud sa falsification of documents ag pag-eabag sa Republic Act 11332 ukon Mandatory Reporting of Notifiable Diseases and Health Events of Public Health Concern Act ag RA 11469 ukon ro Bayanihan to Heal as One Act.
Natueopangdan nga sambilog eamang sa an-om nga RT-PCR test results nga andang ginpa-eksamin ro authentic.
Ro limang test results hay mga photocopies ag ginretoke.
