KALIBO, Aklan—Nagpatigayun it pre-releasing orientation ro Municipal Youth Development Office umpisa ko adlaw it Martes hasta Biyernes para sa mga benepisyaryo it Sustainable Livelihood Program it Department of Social Welfare and Development (DSWD) ag LGU-Kalibo.
Suno kay Youth Development Officer II John Marlou Salido nga kapin sa 365 ka mga negosyanteng Kalibonhon ro napili nga makapanimpueos sa programa.
Ro orientation suno kana hay para sa mga recipient nga paga-releasan it pondo ukon capital sa andang negosyo.
Ginaeauman nga sa masunod nga daywang dominggo hay mabaton eon it mga benepisyaryo ro andang capital assistance grant.
Naeakip man sa pre-releasing orientation ro pagprepara sa mga benepisyaryo, pag-kriar it asosasyon sa nagkaeain-eain nga sector ag pagkolekta it impormasyon para sa pagbukas it individual savings passbook.
Ginatinguhaan suno kana it lokal nga gobyerno nga mabuligan ro mga negosyante nga magamit ro capital sa andang negosyo ag mabuligan sanda nga makatipon.
Ro programa hay may pondong naga-abot sa P3,375,000 halin sa DSWD Regional Office 6.
Gindugang pa ni Salido nga nakadepende ro mabaton nga kantidad it mga benepisaryo sa kinahang-ean it andang negosyo.
