KALIBO, Aklan–Nagapahaum eon ro bilog nga Muslim Community sa bahin it Brgy. Camanci Norte, Numancia sa pag-umpisa it Ramadan.
Suno kay Jamil Tumarangga, lider it Muslim Community nga ro pagsueod it buean it Ramadan hay sambilog sa pinakamabahoe nga selebrasyon sa kultura it mga Islam.
Sa raya sigon nga tyempo hay nagapahaum sanda para sa pagpangamuyo ag pagsamba kay Allah.
Ro buean it pag–ayuno suno kana hay tiempo agud nga sikwayon ro mga bisyo kapareho it adiksyon sa droga ukon pagpanigarilyo.
Sa adlaw it pag-ayuno, tanan sigon sanda nga muslim hay kinahangean nga mag fasting bukon eamang sa pagkaon, kundi maskin sa andang gina-inom, pakikipaghieawas, pakikipag chismisan ag pagsumpa.
Kaparte man it selebrasyon ro paglimpyo sa mga mosque ag andang panimaeay.
Masami sigon nga nagabuhay it 29 hasta 30 diyas ro Ramadan.
Nagapati man ro mga Muslim nga sa kada nagasueod ro buean it Ramadan hay ginabuksan ni Allah ro purtahan it Paraiso ag ginasarado kara ro purtahan it impyerno ag ginakadena ro mga demonyo.
Ro senyales it pagtapos it Ramadan hay ro pagpakita it shawwal ukon crescent moon.
Raya ro tanda it pag-umpisa it ika-napueo nga buean it lunar calendar ag simbolo sa pag-umpisa it sambilog pang selebrasyon it mga Muslim, ro Eid al-Fitr.
