KALIBO, Aklan— Sa pihak it ginapangatubang nga pandemya daea it covid-19, natigayon sa gihapon nga makaselebrar ro atong mga igmanghud nga Muslim it Eid al-Adha ukon Feast of Sacrifice makaron nga adlaw it Martes, Hulyo 22.
Suno kay Abdul Karim it Muslim Community sa Aklan nga temprano pa eamang hay nagtipon-tipon sanda sa andang mga Mosque agud nga mag-ililiba nga magpangamuyo.
Bilang pagdahan sa paeag it COVID-19 hay ginapasiguro nanda nga sa tanan nga aktibidad hay hugut nga ginapatuman ro minimum health protocol sa mosque.
Kinahangean sigon nga ro mga nagasueod sa mosque hay may suksok nga facemask.
Sa sueod man it mosque kun sa siin seryoso sanda nga nagapangamuyo hay may social distancing man.
Pila sigon sa andang mga ginapangamuyo hay magmayad eon ro bilog nga kalibutan halin sa coronavirus disease ag sa mga naging epekto kara.
Maskin nga tumaeagsahon ro andang selebrasyon makaron it mga Muslim sa Eid Al-Adha, sambilog suno kay abdul karim raya nga importanteng adlaw sa Muslim calendar nga kinahangean nga i-selebrar.
Kaeabanan suno kana nga nagapatay sanda it kanding sa raya nga okasyon ukon baka.
