KALIBO, Aklan—Ginkumpirma it Kalibo Municipal Police Station nga naga-abot eon sa kabilugan nga 57 ro na-impound nga tricycle sa ginpabaskog nga anti colorum operation it mga awtoridad sa banwa it Kalibo.
Suno kay P/Major Willian Aguirre, deputy chief of police it Kalibo PNP Station nga sa makaron hay amat-amat eon nga nagakaduea ro mga nagabiyahe nga colorum nga tricycle pagkatapos it one-time-bigtime nga operasyon it kapulisan, Transport and Traffic Management Unit ukon TTMU it lokal nga gobyerno it Kalibo ag Kalibo auxiliary police kun sa siin ro nasambit nga agresibong operasyon hay may koordinasyon sa nagkaeain-eain nga mga tricycle operators and drivers associations ukon TODA.
Apang may pila pa sigon sanda nga nataeupangdan nga nagabiyahe kada gabi-i.
Kabay nga magaserbi sigon raya nga paandam sa mga drivers ag operators it mga colorum nga saeakyan nga magpundo eon sa andang iligal nga hilimuon.
Gin-abisuhan man nana ro mga pribadong tricycle nga mnagbutang it karatula nga private ukon family use.
Dugang pa ni Major Aguirre nga ro mga colorum nga tricycle ro nagapadugang sa paggutok it trapiko sa mga nagapangunang karsadahon sa banwa it Kalibo.
Sa pihak nga parte, mag-eowas sa mga colorum nga tricycle, target man it kapulisan sa andang mga ginakasa nga checkpoint ro mga motorsiklo nga owa naka-rehistro, owa it lisensiya , owa it helmet ag iba pang nagakaigo nga dokumento sa pagbiyahe.
