KALIBO, Aklan—Ginkumpirma ni Nabas mayor James Solanoy ro anang pagpadaeagan bilang vice mayor sa 2022 election.
Raya hay kasunod it pahayag ni dating Nabas mayor Romeo “Lolong” Dalisay nga nakipag-alyansa eon raya sa andang grupo agud nga maduso ro united leadership it tibyog-akean sa nasambit nga banwa.
Nasayuran nga si Dalisay hay sambilog sa andang line-up sa sanggunang panlalawigan sa western side.
Samtang, gindugang pa ni mayor Solanoy nga magiging kandidato nanda sa pagka-mayor si sangguniang bayan member Maria Fe Lasaleta ag kompleto eon man ro andang linyada sa SB members nga ginaeakipan nanday vice mayor Gerry Cezar, SB members Stephen Bolivar, Borek Santiago, Celon dela Torre, Leovilyn dela Torre, Ciciron Palanog, Habana punong barangay Edgar Kahulugan ag dating SB member Mark Zaldivar.
Samtang, nagapahaum man sigon ro oposisyon sa andang mga igabangga nga kandidato.
Samtang, ginkalipay man ni mayor Solanoy ro naexperiensiyahan makaron nga matsa covid free eon ro Nabas.
Raya hay matapos nga owa eon it mga nailistang kaso.
Kon may una man hay tigsambilog eon lang.
Naging aktibo sigon sanda sa pag-isolate sa mga ginadudahan nga covid positive ag insigidang ginapaidaeum sa RT PCR test ro mga close contact it mga raya.
