KALIBO, Aklan—Ginkumpirma ni Nabas mayor James Solanoy nga nabiktima ro andang Municipal Engineer it scammers nga nagagamit sa pangaean ni Police Colonel Esmeraldo Osia, Jr., Provincial Director it Aklan Police Provincial Office agud nga magpangayo it cellphone load.
Suno kana nga sangka nagpakilaea nga staff ni Col. Osia ro nagtawag sa anang opisina ag nagpangayo it bulig nga maka-usoy it contractor para sa anang igapatindog nga baeay sa Brgy. Gibon, Nabas.
Bangud nga trabaho raya it Engineering Department rason nga gin-refer nana ro caller sa andang Municipal Engineer.
Sa andang pag-istorya, nahueog sigon sa bitag it scammers ro andang engineer matapos nga maboe-an raya it 5,000 pesos nga balor it load.
Blangko sigon raya sa nasambit nga modus.
Ginasugid nga ro mga scammers hay nagagamit it tagalog ag Ilonggo nga lenggwahe.
Nagtawag sigon sanda sa andang chief of police ag nakumpirma nga bukon it si Col. Osia ro andang ka-transaksyon.
Bangud kara, nagpaandam si Mayor Solanoy sa anang mga kasimanwa nga magpangaman agud nga indi mabiktima it kaparehong modus operandi.
Ginpahayag dugang nga nakaexperiensiya man it makarondaya nga insidente sanday Buruanga Mayor Labindao ag Tangalan Mayor Fuentes nga sa mayad nga swerte hay owa nabiktima.
