KALIBO, Aklan—Uman nga nag apela si Nabas mayor James Solanoy sa anang mga nasakupan nga indi anay maging pilosopo ag hugut nga sundon ro kaundan it ginpaguwa nga sueundanan makaron nga nakapaidaeum ro Aklan sa general community quarantine ukon GCQ.
Raya eamang sigon makaron ro pinaka nagapangunang kinahangean agud nga masuk-ean ro pagkalhit it virus eabi pa ag ro banwa it Nabas hay ikaywa sa may pinakamataas nga aktibong kaso kasunod it banwa it Kalibo.
Maabu suno kana ro nagabatikos sa gobyerno bangud sa ginahimo nga pag instrikto, apang kon magpatuman it ‘kamay na bakal’ hay maabu man ro naga reklamo.
Gindugang pa ni mayor Solanoy nga kinahangean nga magkooperar anay ro tanan ag magpatuman it disiplina sa kaugalingon agud nga indi eon magbuhay ro ginapatuman nga pag instrikto kapareho it naexperiensiyahan makaron.
Ginpadumdum pa it opisyal nga indi pagbalewalaon ro COVID-19 ag pirmeng sundon ro minimum health standards.
Likawan man anay ro mga gatherings bangud nga raya hay nakakadugang sa andang COVID cases ag kon pwede hay magpabilin sa sueod it mga baeay kun owa man lang it importanteng paga-agtunan.
