KALIBO, Aklan–Prayoridad makaron ni Nabas Mayor James Solanoy ro pagkriar it maabu nga ordinansa para sa kamaeayran it anang banwa.
Raya ro ginpasiguro ni Solanoy matapos nga magdaog bilang bise alkalde it Nabas sa May 9, 2022 national and local elections.
Nasayuran nga ro legislative body ro nagapanguna sa pagduso it mga ordinansa rason nga raya sigon ro anang pagatutukan.
Pila sa mga gustong taw-an it igtueopangod ni Solanoy hay ro boundary nanda it Malay, i-regulate ro operasyon it mga cold spring ag iba pang tourist spot sa Nabas para masiguro nga makabulig raya sa kamaeayran it banwa kamana man nga makahimo it maabu nga oportunidad sa mga pumueoyo.
Nasayuran nga ulihing termino eon ni Solanoy sa pagka-alkalde rason nga nagdesisyon imaw nga magpadaeagan bilang bise alkalde para mapadayun ro anang pagserbisyo.
Samtang, ginlaygayan man kara ro ibang kandidato nga napas-eawan sa andang karera nga batunon eon lang ro resulta it eleksyon.
