KALIBO, Aklan — Nagbulig eon ro barangay council it Ugsod, Banga sa pag-usoy sa naduea nga construction worker nga si Rovel Montuya, may tatlong domingo eon ro nagtaliwan sa nasambit nga lugar.
Suno kay Punong Barangay Giovanni Villanueva it Ugsod, Banga nga owa sanda nagapabaya sa nasambit nga missing person bangud nga una sa andang hurisdiksyon raya ulihi nga nakita nga buhi nga nakikipag-inuman sa anang mga amigo antes nga gindeklara nga missing it mga otoridad .
Nagpatigayon sigon sanda it pag-usoy ko nagtaliwan nga Sabado sa mga lugar nga ginaturo nga posibleng gin-eubngan kay Montuya, apang owa sanda it nakita nga senyales it kinutkutan ag owa man it nahumgan nga kakaibang hugum.
Angot kara, gin-engganyo ni Kapitan Villanueva si Montuya nga magpakita eon agud nga matuldukan ro misteryo sa anang pagkaduea kamana man sa mga residente nga may kasayuran sa anang ginakahimtangan nga makipagbueuligan sa mga otoridad.
Madumduman nga si Montuya hay nasayuran nga naduea matapos nga mag-usoy ro anang misis sa anang gina-obrahan kat owa raya naka-uli sa andang baeay.
Ro anang bike ag kaeo nga pirme nana nga ginadaea ro nakita sa baeay it anang kabarkada.
Nagapati ro anang pamilya nga kon buhi imaw, mabuhay eon nana nga ginbalikan ro anang mga gamit apang hasta sa makaron hay owa raya nagapakita.
Sa pihak nga parte, ginpahayag ni Rodel Alejandro, tag-ana it gina-obrahan ni Rovel Montuya nga owa man imaw it nasayuran nga naging kaaway it missing person.
Pakyawan sigon ro anang pag-“hire” kara sa anang ginapa-obra nga cabinet kun sa siin mayad imaw nga mag-carving.
Nangawa eon lang sigon imaw nga owa eon raya nakabalik sa anang trabaho ko agahon it Hulyo 24 .
Puro sigon nana kasimaryo ro mga tawo nga ginaturo nga ulihing naka-inuman ag naka-ibahan ni Montuya.
