KALIBO, Aklan — Nasapwan nga patay eon ro sangka crew nga napabalitang naduea matapos nga aksidenteng mahueog sa ginasakyan nga barge sa kaeawran nga sakop it Boracay sa kasagsagan it bagyong Hanna ko adlaw it Martes.
Suno kay PO3rd Michelle Baligo it Philippine Coast Guard (PCG)-Aklan, nakita ro bangkay it biktimang si Ronaldo Tolenero, 52, residente it Brgy. Dumatad, Tangalan, Aklan ag sambilog sa mga crew it LCM Divine Providence II nga naga-eutaw-eutaw sa dagat maeapit sa Cagban Port, ko gabi-i it biyernes it sangka tagabantay it mga sailboat.
Ro bangkay it biktima hay insigidang gindaea sa sangka funeral parlor sa Brgy. Caticlan ag makaron hay natigayon eon nga madaea sa anang pamilya.
Madumduman nga samtang nga naga-eayag ro barge paagto kunta sa Manocmanoc port sa isla hay nataeupangdan it anang mga kaibahan nga missing ro biktima nga ginapatihan nga nahueog bangud sa kabaskog it hangin ag humbak.
Insigida nga nagpatigayon it pag-usoy ro coast guard, apang napas-eawan raya nga makit-an.
