KALIBO, Aklan — Naga abot eon sa P600-million ro nadueang kita it Kalibo International Airport (KIA) banghyud sa temporaryong pagpasara sa isla it Boracay.
Sa interview it Bombo Radyo, gin pahayag ni Civil Aviation Authority of the Philippines (CAAP)-Aklan manager Efren Nagrama nga tatlong beses eamang ro flight nga puros domestic kada adlaw sa paeuparan kumpara dati nga owa it untatb ro pag abot it mga eroplano sa sueod it 24 oras.
Bago sigon ro Boracay shutdown ku Abril 26 hay haeos 31 ro andang international ag 11 ro domestic flights.
Nanibag-o sigon sanda sa gulpiyadang pag haeuga it terminal area it airport dahilan nga pila sa andang mga tawuhan hay gin saylu anay sa Roxas City, Capiz ag Iloilo City.
Gin pahayag dugang pa ni Nagrama nga gina hueat eon lang nanda ro “go signal” maghalin sa Department of Transportation (DOTr) agud maumpisahan ro improvement ag expansion it terminal building it paeuparan kamana man ro renovation ag construction it mga stalls it mga mabahoe nga kompaniya nga naga upa sa bisinidad it airport samtang gina paidaeum sa rehabilitasyon ro Boracay.
