Patay eon kat masapwan kahapon it truadlaw ro sangka mangingisda nga may pilang adlaw eon nga naduea sa Isla it Boracay.
Raya ro ginkumpirma ni Lt. Val Ernie Daitao, Commander it Philippine Coast Guard (PCG)-Aklan.
Ginkilaea ro biktima kay Ernesto Coching, 64-anyos, sangka chieftain it ati tribe ukon mga katutubo sa isla.
Nasapwan ro mga bangkay ni Coching it mga tawohan it sangka hotel sakay it speedboat sa bahin it Cagban jetty port nga paeotaw-eutaw, bandang alas-11:24 it truadlaw.
Madumduman nga eumugdang ro ginasakyang motorized bangka ni Coching, kaibahan ro anang panagueangan nga si Ricky Valencia, 37, matapos makabungguan ro speed boat it sangka kilaeang hotel, bandang 9:20 it gabi-e ko nagtaliwan nga Miyerkules, Abril 5, 2023 maeapit sa nasambit nga pantalan kung siin raya nasapwan.
Si Valencia hay maswerteng nakaeowas ag gindaea sa ospital para sa nagakaigong pagbueong samtang si Coching hay owa nakit-an.
Kahapon it Sabado, ginpangunahan ni Department of the Interior and Local Government (DILG) Secretary Benjamin “Benhur” Abalos, Jr. Ro pagpatigayon it search and retrieval operation it mga awtoridad kaibahan ro mga pulis ag miyembro it Philippine Coast Guard para kay Coching.
Ginapahayag dugang pa ni Coast Guard commander Daitao nagsunod si Sec. Abalos sa ginkasang scuba search and retrieval operations kaibahan ro masobra sa 40 divers.
Kaibahan ro PNP, PCG, ag Malay Municipal Risk Reduction and Management Office (MDRRMO), personal nga ginbisita ag gin-istorya ni Abalos ro mga kapamilya ni Coching ag mga miyembro it Malaynon ATI Tribe Association ukon MATA ag ginpasigurong makit-an raya.
Nauna kara, nag-apela ro sekretaryo sa mga diving shops ag organizations nga makigbuylog sa mga rescuers para makaangkon it mabahoe nga tsansang makit-an si Coching.
Samtang , buhos sa gihapon ro mga turista sa Boracay hasta makaron nga adlaw it Domingo it Pagkabanhaw
