Sangka babaye sa West Virginia, U.S.A. ro nakit-an ro anang wallet nga naaywan nana kat imaw hay high school pa eamang, may 55 anyos eon ro nagtaliwan.
Naduea ni Sharon Day ro anang wallet kat imaw hay 16 years old sa Fayetteville High School ko dag-on 1968.
May party kato sa andang eskwelahan kat mataeupangdan kara nga owa eon sa anang bag ro wallet nga may sueod nga mga litrato ag sangkiri nga kwarta.
Umpisa kato owa eon imaw nagaeaum nga makit-an pa ro wallet ag mga sueod kara.
Ko 2019, permanente eon nga ginpasaraduhan ro Fayetteville High School.
Samtang raya hay gina-renovate it New River Contracting company para obrahon nga apartment, nakibot ro mga trabahador kat may mahueog nga wallet halin sa airduct sa kisame.
Suno sa tag-ana it contracting company nga si Bradley Scott, matapos nanda nga boe-on ro 100 years old nga airduct system it eskwelahan agud nga raya hay bayluhan it bag-o, maabu sandang nakit-an nga mga personal items it mga estudyante sa sueod kara ag sambilog eon ro wallet ni Sharon Day.
Gamit ro social media, gin-post ni Bradley Scott ro mga nakit-an nana nga gamit agud nga usuyon ro mga tag-ana kara.
Owa pa it sang domingo nga pag-post kara sa Facebook, nakabaton imaw it mensahe halin kay Sharon Day.
Mabahoe ro pagpasaeamat ni Sharon Day sa contracting company nga nagtau it oras agud nga usuyon ro mga nagapanag-iya it mga nadueang gamit.
Sa makaron hay ginaplano nana nga ibutang sa photo album ro mga litrato sa anang wallet.
Owa man ginhambae kon paalin nga naagto sa airduct ro wallet ni Sharon.
