KALIBO, Aklan—Nag-angkon it lastro sa siki ro sangka pahinante matapos nga bumaliskad ro ginasakyan kara nga close van kahapon sa daeanon nga sakop it Brgy. Venturanza, Banga.
Ginkilaea ro biktima nga si Nathaniel Mahilong, 20-anyos samtang ro driver hay nakilaea kay Michael Gonzales, 44-anyos parehong residente it Roxas City, Capiz.
Base sa imbestigasyon it Banga PNP, halin sa siyudad it Roxas ro behikulo ag magapaadto eon kunta sa banwa it Kalibo kat madueaan it kontrol si Gonzales.
Ginapahayag nga madanlog ro nasambit nga daean ag medyo paubuson rason nga bumaliskad ro behikulo.
Insigida man nga nagpatigayun it flashing ro mga katapo it Bureau of Fire Protection (BFP) para limpyuhan ro nagkalhit nga diesel sa daean matapos nga masamad ro tangke it close van.
