KALIBO, Aklan — Naaresto eon ro suspek nga nag-eabo sa sangka Chinese engineer sa sangka construction site sa Barangay Maria Cristina, Madalag, Aklan.
Ro suspek nga ginkilaeang si Ramy Rufino, 27, sangka transit mixer driver ag residente it nasambitang banwa hay nadakpan sa anang ginapanaguan sa Barangay Alas-as ko mga tawuhan it Madalag Police Station.
Suno sa mga otoridad, natunton nanda ro suspek matapos makaaangkon it impormasyon nga nagkumpirma sa ginapanaguan kara.
Nasayuran nga si Rufino matapos nga maeab-an ro biktimang si Shi Ji Wu, 26, sangka engineer it China Water International Inc. sa ginahimong hydro power plant sa nasambitang banwa.
Natabo ro insidente ko Nobyembre 17 it gabi-e kat magsueod ro suspek sa barracks it dumueoong agud papirmahan kunta ro anang DTR para makabueo it sweldo pagkaagahon.
Apang, absent raya sa nasambitang adlaw rason nga uwa raya ginpirmahan it engineer.
Napikon ro suspek ag gin-eabo it anang daeang sanduko ro dumueoong nga gintamaan sa anang dughan ag waea nga abaga.
Gilayon nga nagpaeagyo si Rufino matapos ro insidente samtang insigida man nga gindaea sa sangka pribadong ospital ro biktima nga una eon sa mayad nga kondisyon sa makaron.
