KALIBO, Aklan—-Nag-umpisa eon nga magbisita ro pilang indibidwal sa andang mga nagtaliwan nga mahae sa kabuhi matapos nga i-mando ro pagpasarado it mga sementeryo ag kolumbaryo sa maabot nga pyesta minatay bagud sa COVID-19 pandemic.
Suno kay Norberto Clarite, gwardiya sa Medalla Milagrosa Cemetery, maabo eon nga mga tawo ro naga-adto sa sementeryo para magbisita, magsindi it kandila ag maghaead it bueak sa andang mga kapamilya nga nagtaliwan.
Sa pihak kara, hugut sigon nanda nga ginapatuman ro pagsuksok it face mask ag face shield kamana man ro pag-obserba it physical distancing it mga tawong nagasueod.
Raya sigon hay bilang precautionary measures agud nga malikawan ro pagkalhit it virus.
Samtang, gina-engganyo man kara ro mga nagabisita ukon nagalimpyo it pantyon nga ipilak it maayos ro andang mga basura.//
Samtang, base sa ginpagguwa nga resolusyon it National Inter-Agency Task Force, ginamando ro pagpasarado sa tanan nga pribado ag pampublikong memorial parks ag columbarium sa tanan nga lugar sa nasyon halin Oktubre 29 hasta Nobyembre 4.
Pagalimitahan man sa 30 porsiyento ro venue capacity ukon ro numero it mga magabisita sa mga sementeryo antes ukon pagkatapos ro mga petsa it pagpasarado.
