KALIBO, Aklan — Aminado ro 19 anyos nga eaeaking estudyante nga gin-koebaan imaw kat ginparahan it mga enforcers it Land Transportation Office (LTO) Region 6 sa banwa it Banga.
Nag-viral sa social media ro sangka video kun sa siin makita nga naga-euhod ag nagatangis imaw nga nagapakitluoy sa enforcer nga indi pagtiketan ag i-impound ro anang motorsiklo.
Suno kana nga maabu ro anang violations bangud nga mag-eowas nga owa it lisensiya hay owa pa it nagakaigo nga dokumento ro anang motorsiklo.
Dugang pa nga substandard ro helmet nga anang ginagamit.
Ginpahayag sa Bombo Radyo ni alias Christian nga masyadong importante kana ro anang motorsiklo nga gina obra nga service paagto sa eskwelahan.
Engkaso suno kana nga ma impound hay mabudlay para kana nga raya hay maeukat bangud nga owa imaw it nagakaigo nga kwartang pangbayad bilang sangka working student ag maeayo sa anang mga ginikanan.
Nakibot suno kana imaw ag nagpasaeamat kat uman nga ginbalik kana ro yabe it motorsiklo kadungan ro pagpatindog ag paghakos man kana it enforcer.
Apang ginpadumdum sigon kana nga antes nga magmaneho hay dapat nga kompleto ro anang mga dokumento.
Sa Lunes hay nakataeana nga maga-agto imaw sa opisina it LTO Kalibo agud nga mabuligan nga makabo-oe it lisensiya ag mapa-rehistro ro anang motorsiklo.
