KALIBO, Aklan—Naga-abot eon sa kabilugang 3,838 ro mga healthcare workers nga nabakunahan kontra Coronavirus Disease 2019 ukon COVID-19 sa probinsya it Aklan.
Ginpahayag ni Dr. Leslie Ann Luces it Provincial Health Office (PHO)-Aklan nga may nag-abot nga dugang nga 1,000 doses it Sinovac vaccine sa probinsya.
Suno kana, nag-umpisa eon ro vaccination rollout sa pilang ka mga munisipyo kamana man nga target nandang maabot ro mga kabarangayan.
Ro mga lokal nga gobyerno sigon nga nakapatigayun eon it simulation exercises ro una nandang gintaw-an it alokasyon.
Ro mga nasambit nga bakuna suno kana hay sobrang supply halin sa andang ginturok sa mga medical frontliners sa ABL Sports and Cultural Complex.
Ginklaro man kara nga ro mga vaccinees hay dapat nga nakapatigayun it pre-registration antes mag-adto sa mismong vaccination site ag indi pwede ro walk in.
Ro tatlong ka mga banwa nga nauna eon nga nagpatigayun it vaccination rollout hay ro Tangalan, Balete ag New Washington.
Samtang, makaron man nga adlaw naka-schedule ro banwa it Kalibo, Nabas ag Buruanga.
Dugang pa ni Dr. Luces nga ginatinguhaan nanda nga matapos it pagbakuna ro andang target nga 11,000 nga mga healthcare workers nga una sa A1 priority list.
Raya hay para makapanaog eon sanda sa masunod nga priority nga ginakaeakipan it mga senior citizens.
