KALIBO, Aklan—Naga-abot sa masobra 100, 000 pesos ro naging danyos it nag-eontad nga sunog sa sangka villa nga ginapanag-iyahan it lokal nga emirates sa Dubai.
Suno kay Bombo International Correspondent Jun Sanico, natabo ro sunog bandang alas-5 it aga-aga ko adlaw it Huwebes, Setyembre 24.
Suno kana, electrical fault halin sa saksakan it microwave ag refrigerator ro ginhalin it kaeayo.
Sangka Indian National sigon nga kaibahan man nanda sa baeay ro unang nakapan-o sa sunog ag raya man ro nagpukaw kanda.
Bangud sa insidente hay natigayun nga maugdaw ro haeos tanan nga kagamitan sa sueod it andang gina-istaran.
Owa sigon sanda it nasalbar nga gamit maeuwas eon lang sa sangka hand bag nga may sueod nga importanteng dokumento.
Sa pihak nga parte, nagapasaeamat man si Mrs. Ferlin Relojas, sangka OFW sa Dubai ag tumandok it Brgy. Bulabod, Malinao bangud nga owa kanda it nahalitan sa natabo nga sunog eabi pa ag kaibahan nana ro anang asawa ag unga.
Suno kana, maabo man sigon ro nagpaabot it bulig matapos ro insidente kaibahan eon ro konsulada it Pilipinas ag pilang grupo it mga Filipino ag dumueoo.
