KALIBO, Aklan–Ginklaru it kapulisan nga owa it kamatuoran ro mga espekulasyon nga may naga-warang nga aswang sa Barangay Calizo, Balete.
Suno kay P/Major Bryan Alamo, hepe it Balete Municipal Police Station nga posibleng taktika eamang it mga maeain nga elemento ro sunud-sunod nga insidente it pagpanghaboy it bato sa mga kabaeayan agud nga magpataeang sa andang matuod nga tuyo nga magpanakaw.
Nag-ugat ro insidente matapos nga sangka baeay ro ginhana nga sudlon it owa nakilaea nga indibidwal, apang nabugtawan it tagbaeay.
Nag-eumpat sigon raya halin sa mataas nga bungbungan it baeay rason nga nasae-an nga “aswang”.
Maskin nga owa it pormal nga reklamo nga nabaton, ginpabaskog it balete pnp ro andang presensiya sa lugar pinaagi sa pag-deploy it mga kapulisan nga naga-patrolya agahon ag gabi-i kabulig ro mga barangay tanod.
Sa makaron hay uman sigon nga nagbalik ro katawhay sa lugar ag owa eon it nailistang mga stoning incident partikular sa gabi-i.
Samtang, ginpahayag pa ni Major Alamo nga may natumod eon man sanda nga person of interest sa insidente .
Bangud sigon sa mga natabu hay naging aktibo ag alerto ro mga pumueuyu sa pagbantay sa andang palibot kamana man ro mga opisyal it barangay.
Bukon suno kana it imposible nga makaangkon it mga kaso it panawakan makaron nga tiempo bangud sa tag-gutom tuga it mahina nga ani ukon patubas nga tuga it naeksperyensiyahan nga el nino .
Apela it opisyal sa mga pumueuyu nga indi eamang makuntento nga ipaabot ro andang reklamo sa social media kundi nga iderikta sa kapulisan agud nga insigidang marespondehan ag mataw-an it aksyon.
Makabig sigon raya nga sangka isolated case.
