Posibleng maga-abot sa masobra $6 milyon ro balor it kakaibang trading card ni NBA star LeBron James.
Ro “Triple Logoman” card, nga naga-isaeahanon nga naipagguwa nga card it 18-time NBA All-Star hay may nakabutang nga patches halin sa jerseys ni James samtang imaw hay naghampang sa Cleveland Cavaliers, Miami Heat ag sa Los Angeles Lakers.
Ginpagguwa raya it Panini bilang kaparte it 2020-21 “Flawless” collection.
Raya ro gina-usoy it mga collectors kaibahan ro Canadian rapper nga si Drake kung siin nagbakae pa raya it 10 kaha it nasambit nga basketball cards apang napas-eawan raya nga makita.
Ginpahayag man ni Ken Golding ro executive chairman it Goldin Auctions nga raya ro naga-isaeahanon sa bilog nga kalibutan rason nga masyadong mahae ro presyo.
Nadiskubre ro card matapos ro pilang dag-on nga pag-usoy halin sa collectors nga ginpatigayun sa live social media event.
Makabig man raya bilang “Holy Grail” it sports collectibles ag posible kara nga maeampasan ro trading card ni Honus Wagner T-206 baseball card nga naibaligya ko Agosto sa balor nga $6.6-M.
Magasarado it hasta Hunyo 25 ro auction it nasambit nga “Triple Logoman”.
