KALIBO, Aklan—Nag-abot eon sa masobra sa P100.3 milyon pesos ro kantidad it kahalitan it tigmaeaea sa probinsiya it Antique tuga it El Niño.
Raya ro ginpahayag ni Broderick Gayona Train, head it Provincial Disaster Risk Reduction and Management Office ukon PDRRMO-Antique sa interview it Bombo Radyo.
Sa makaron hay ro paeay sigon ro pinaka-apektado it tigmaeaea, kun sa siin ro kahalitan hay kapin sa P88 milyon pesos.
Nag abot man sa masobra 12 milyon pesos ro kantidad it nasamad sa tanum nga mais samtang haeos P300,000 pesos ro apektado sa livestock partikular ro mga alagang baka ag kanding bangud nga haeos nga owa eon it mahang-eab nga halimunon.
Sa pihak nga parte, nag-umpisa eon man suno kana nga mag-supply it tubi sa mga kabaeayan ro limang lokal nga gobyerno it Antique matapos nga magmaea ro andang mga water source ukon ginaboe-an it tubi eabi eon sa mga irigasyon.
Maskin suno kana ro mga sakit nga tuga it epekto it El Niño hay presente nanda nga gina monitor kun sa siin eubus ro andang pagpasaeamat bangud nga owa pa it may nailistang health related illness sa lugar.
Naka-blue alert eon man sigon ro andang emergency operations center bilang pagpahaum sa pagtuhaw it mga grass fires ukon bush fires kun sa siin may mga nailista eon nga kaso nga ro pinaka-ulihi hay ko Pebrero 12 sa Anini-y ag Tobis Fornier nga ro sunog hay sumakop sa kapin sa 60 ektaryang kabukiran nga nagpa-ugdaw sa mga tanum nga niyog, saging, mga butong ag iba pa.
Sa makaron hay uman suno kana nga ginbuhi it provincial government it Antique ro El Niño Task Force.
Raya hay ginaeakipan it Office of the Provincial Agriculturist, PDRRMO, Regional Office it Department of Agriculture nga nagabulig sa pagpatigayon it assessment sa mga nailistang kahalitan.
Dugang pa ni Train nga ro pinaka-apekto makaron hay ro central ag southern part it Antique matapos nga owa naka-eksperyensiya it mga pag-uean umpisa ko buean it Disyembre ag grabe ro init partikular sa mga banwa it Barbasa, Lawaan, Sibalom, San Remegio, Tobias Fornier, Hamtic, ag portion it Anini-y.
