KALIBO, Aklan — Arestado sa entrapment operation ko Lunes it agahon ro sangka eaeaki nga nagabaligya sigon it tingi nga gasolina sa Brgy. Man-up, Altavas.
Nakilaea ro suspek nga si Donato Baleña, 64, residente it nasambit nga lugar nga gina-alegar nga nagabaligya it produktong petrolyo nga nakabutang eamang sa mga bote it softdrinks, toyo ag mineral water.
Ginasugid nga patago ro pagbaligya it gasoline it suspek sa mga motorista sa sueod it anang compound umpisa alas-4:00 it aga-aga hasta alas-6:00 it agahon.
Gindakop si Baleña matapos nga mabak-ean it tingi nga gasolina it poseur buyer gamit ro tatlong bilog nga P20 nga kon sa siin ro sambilog kara hay marked money.
Ginkumpiska it mga otoridad ro kapin sa 227 litro it gasolina nga nagabalor it kapin sa P10,896.
Nasayuran nga dag-on 2003 pa kat magpaguwa ro Department of Energy (DOE) it Memorandum Circular No. 2003-11-010 nga nagabawae sa pagbaligya it gasolina ukon iba pang produktong petrolyo sa mga bote bangud sa peligrong daea kara sa ikamayad nga eawas ag palibot.
