KALIBO, Aklan — Nagapangatubang sa kasong pag-eabag sa Presidential Decree (PD) 1865 ukon illegal trade of petroleum products ro daywang katawo matapos nga madakpan sa checkpoint ro sangka pick-up nga ginasakyan it mga raya nga kargado it 37 nga container it gasolina ag daywang container it krudo.
Nakilaea ro mga suspek nga sanday Melojean Rustro, 45, tag-ana it saeakyan ag driver kara nga si Jodinar Jaco, 31, parehong residente it Brgy. Aranas, Balete.
Base sa report, bandang alas-10:20 agahon it Domingo kat madakpan sa national highway it Brgy. Odiong, Altavas ro mga suspek sakay it pick-up karga ro kabilugan nga 780 litro it petroleum products nga nagabalor it ginatantiya nga masobra sa P34,000.
Ginasugid nga ro nasambit nga mga petroleum products hay pagadaehon kunta sa Brgy. Aranas, Balete matapos nga bak-eon sa sangka gasoline station sa banwa it Altavas.
Owa ro mga raya it nagakaigo nga permit to transport rason nga gindakop sa checkpoint it pulisya.
