KALIBO, Aklan — Haeos indi makapati ro nagadumaea sa Tribu Linabuanon matapos nga gindeklarang biggest winner kontra sa iba pang nagpasakop nga tribu sa Tribal Big Group Category sa bag-o eamang natapos nga Kalibo Sto. Niño Ati-Atihan Street dancing competition.
Suno kay Rendel Ortega, co-founder it tribu nga bangud sa naangkon nga kadaeag-an hay naging sulit ro andang mga sakripisyo kaibahan ro mga dancers ag drummers sa pag-obra it mga costume ag pag-praktis it andang patik.
Dugang pa nga mabahoe nga grasya ro andang nabaton bangud nga haeos tatlong dag-on pa eamang sanda nga nagapasakop sa nasambit nga kategorya .
Ko 2023 suno kana hay nabo-oe nanda ro 3rd place ag 1st place ko 2024 .
Mabahoe man suno kana ro andang adjustment nga ginhimo partikular sa pag-obra it mga costumes bangud nga halin sa dating gina-intrahan nga Modern Group Category hay nag-shift sanda sa tribal big .
Sa mayad nga swerte suno kana ag may ideya sanda sa pag-handle kara bangud sa andang eksperyensiya sa dating ginapasakupan nga grupo nga Black Beauty Boys.
Sa pihak nga parte, plano nanda nga tipunon ro nadag-an nga P1.1 milyon nga cash prize bilang pondo it andang grupo.
Nasayuran nga ro dating kampeon nga Black Beauty Boys hay naging 1st runner up makaron, 2nd runner up ro Vikings ag 3rd runner up ro Libtong Boys.
Ro Tribal Big Group Category hay ro may mabahoe nga amount it cash prizes allocation.
