KALIBO, Aklan—Nagaka-agnas eon nga bangkay kat makit-an ro sangka dalagita sa sangka maligwin nga lugar sa Brgy. Nazareth sa banwa it Buruanga.
Suno kay punong barangay Abito Juanillo it nasambit nga lugar nga bandang alas-3:00 hapon it Lunes hay ginpahisayod kana it mga residente ro angot sa nadiskubrehan nga eawas it biktimang si Aprilyn Largueza, 16 anyos, sangka grade 11 student ag residente it nasambit nga lugar.
Sa pagresponde it mga pulis sa lugar, nagsub-eang kanda ro mabaho nga hugum halin sa nagaka-agnas nga bangkay.
Ginapatihan nga nagbigti ro dalagita bangud sa nakita nga kaeat sa puno.
Agosto 18 ulihi raya nga nakita nga buhi nga nag-ea-ong pa sa anang nanay nga maga-agto sa anang kakilaea sa parte it Antique.
Apang kat gin-usoy it anang mga ginikanan hay owa man idtu.
Bangud nga haeos daywang domingo eon nga missing ro biktima hay nagbueag eon ro anang ueo sa anang eawas nga nahueog sa eugta.
Ginasugid nga naglayas ro biktima bangud sa personal nga problema nga ginapangatubang.
Mabahoe man ro pagpati ni kapitan Juanillo nga nabdos ro dalagita ag posibleng nahadlok nga magsugid sa anang ginikanan it anang kahimtangan.
Ro insidente hay gin-imbestigahan eon it SOCO samtang ro bangkay hay ginpaidaeum sa autopsy agud nga matumod kon may foul play sa anang pagkamatay.
