KALIBO, Aklan—Nagakaagnas eon ro patay nga eawas it sangka tawo kat nasapwan raya sa kahilamunan sa Brgy. Palale, Banga.
Suno kay Noel Orquiola, residente it nasambit nga lugar nga nakit-an ro patay nga eawas it eaeaking ginkilaea kay “Jaime” naga pang edaron it 60 anyos it anang tawo nga nagahilamon sa anang ugsaran.
Una kara, nakahugom sanda it bukon it manami nga hugom apang sa pag-eaom nga higko eamang raya it manok nga ginabuead rason nga ginbaliwala nanda.
Posibleng pilang adlaw eon nga namatay ro biktima.
Ginpahayag dugang ni Orquiola nga may payag sa tabok ro biktima apang nagapanaw-panaw man raya ag ginasugo-sugo kon sa siin ginapakaon man imaw it anang ginaobrahan.
Si Jaime hay tubong syudad it Bacolod apang nakaadto sa nasambit nga lugar matapos nga ro anang onga hay nakapangasawa it taga-Palale.
Ro insidente hay padayon pang ginaimbestigan it Banga Municipal Police Station agud nga matumod ro gintunaan it kamatayon it nasambit nga biktima.
