KALIBO, Aklan — Nasapwan nga nagaka-agnas eon nga bangkay ro sangka retiradong principal sa sueod it anang baeay sa Peraz Vill, Barangay Old Buswang, Kalibo, Aklan.
Nakilaea ro biktimang si Rey delos Reyes, 60, owa it asawa, tubong Pandan, Antique ag presenteng naga-istar sa nasambit nga lugar.
Sa imbestigasyon it Kalibo Municipal Police Station, gin-report kanda nga may naga-alingasaw nga mabahong hugum nga halin sa baeay it biktima.
Mag-eowas kara, nataeupangdan it mga residente nga pilang adlaw eon raya nga owa nagaguwa sa anang baeay.
Nasayuran pa nga owa it ibang kaibahan sa baeay ro biktima ag kada adlaw eamang nagasueod ro anang kabulig.
Nagpangayo it bulig ro mga barangay official sa pulisya agud nga mabuksan ag makasueod sa baeay.
Dikara hay tumambad kanda ro nagaka-agnas nga eawas it biktima samtang nakakaya sa anang kama.
Owa man sigon it anumang nina ro bangkay kat usisaon it Scene of the Crime Operatives (SOCO) rason nga ginapatihan nga namatay raya bangud sa anang ginabatyag nga sakit sa tagipusuon.
